መትሮፖሊታን ኦርቶዶክሳዊት ቤተ ክርስቲያን ምስሪ ምስ ፓትርያርክ እንጦንዮስ ኣብ ኣስመራ ተራኺቦም

ክቡራን ሕዝበ-እግዚኣብሔርን ውሉደ-ክህነትን ኦርቶዶክሳዊት ቤተ ክርስቲያን ኤርትራ፥
ኣብ ዝሓለፈ ወርሒ ግንቦት፥ መትሮፖሊታን ሊቀ ጳጳስ ኦርቶዶክሳዊት ቤተ ክርስቲያን ምስሪ ዝመርሕዎ ጉጅለ፥ ምስ 3ይ ፓትርያርክ ቅዱስ ኣቡነ እንጦንዮስ ኣብ ኣስመራ ተራኺቦም። ብተወሳኺ፥ ፓትርያርክ እንጦንዮስ፥ ብኹነታት ጥዕናኦም ደሓን ከምዘለዉ’ውን ክፍለጥ ተኻኢሉ ኣሎ።

ኣብ ቤተ ክርስቲያን ተዋሕዶ ን10 ዓመታት ከቢድ ዕንወት፥ ውግዘት፥ ማእሰርቲ፥ ምፍልላይን ሕጊ-ኣልቦነትን ነጊሱ ከምዝጸንሐ ዝፍለጥ ኮይኑ፥ መደብ እግዚኣብሔር ኮይኑ ግና ኣብ ወርሒ መስከረም 2014 ብተበግሶ ሥምረት ገዳማት ኤርትራ ዝጀመረ ምግላፍ ዘይሕጋዊ ምምሕዳር ኣቶ ዮፍታሄ ድሜጥሮስን ቀሺ ሃብቶም ርእሶምን፡ ሓድሽ ኵነታትን ኣንፈትን ከም ዝተፈጥረ ዝዝከር እዩ።

ን10 ዓመታት ዝኣክል ሕቶ መንበረ ጵጵስና ሰሜን ኣሜሪካ’ውን ንጹርን ዘየማትእን ኮይኑ እዩ ጸኒሑ። ንሱ ድማ፥ ዝተጣሕሰ ቀኖና ቤተክርስቲያን ተዋህዶ ናብ ንብሩ ይመለስ፥ ፓትርያርክ እንጦንዮስ ናብ ቦታኦም ተመሊሶም ንቤተ ክርስቲያን ተዋህዶ ይምርሕዋ ዝብል እዩ። እዚ ምስ ዝኸውን እዩ ቤተ ክርስቲያን ተዋሕዶ ብሓዋርያዊ መሪሕነትን ስምረት ክትነብር ትኽእል።

ሕጂውን ኣብ ሕጊ፥ ጽድቅን ሓቀኛ ፍቕርን ዝተመሥረተ ወግዓዊ ዕርቂ ኣብ መንጎ ቅዱስ ፓትርያርክ እንጦንዮስን ጳጳሳትን ንኽትግበር መልእኽትና ነመሓላልፍ።

መንበረ-ጵጵስና ኣህጉረ ስብከታት ሰሜን ኣሜሪካ፥ ኤውሮጳን ማእከላይ ምብራቕን                            

13 ሰነ 2015 (፮ ሰነ ፳፻፯ ዓ.ም ግእዝ)