Category

ካብ ኣባል 72 ነበር ባጽዕ
“ዋናታቱ ዒራዒሮ ሸሚምካስ ሸነን”

“ፈንቅል!” ዋናታትካ ኣብ ከርስኻ ኣብ ከርሲ ምድረ-ሰምሃር ከምዘለውስ ትፈልጥ ዶ?

ቅድሚ 24 ዓመት ከምዚ ቅንያት ስርሒት ፈንቅል ተኻይዱ ህልውና ስርዓት ደርጊ ኣብ ኤርትራ ከምዘብቀዐ ተጋሂዱ፡፡ ልቢ’ቲ ንልዕሊ 30 ዓመታት ብኹሉንትንኡ ዝተጋደለ ተጋዳላይን ህዝብን ኤርትራ ዘረስረሰ መስተንክራዊ ስርሒት ተፈጺሙ፡፡ ንወለዶታት ዝወራረስ ታሪኽ ተሰኒዱ ሓሊፉ፡፡
ሜ/ጀነራል ገብረዝጊሄር ዓንደማርያም (ውጩ) ሚስጢር ዓወት ስርሒት ፈንቅል እንታይ’ዩ? ተባሂሉ ኣብ ጽባሕ’ቲ ዓወት ምስ ተሓተተ “…ጽፉፍ ስለያዊ መጽናዕቲ ኣሃዱታት ስለያና…” ብምባል ካብቶም ሚስጢር ዓወት ፈንቅል ሓደን ቀንድን ከምዝነበረ ምስክርነቱ ሂቡ፡፡ ናይ ብሓቂ ድማ ውህሉል ስለያዊ መጽናዕቲ ናይ ሰምሃር ጥራይ ዘይኮነ ውህሉል ስለያዊ መጽናዕቲ ኣብ ልዕሊ መላእ ካልኣይ ኣብዮታዊ ሰራዊት (ሁ.አ.ሰ.) ውጽኢት ኣሃዱ ስለያ 72 ብወዲ ሰለሞን ዝምራሕ ዝነበረ ምዃኑ ምስክርነት ዝሓትት ኣይኮነን፡፡
እንተኾነ ክሳብ’ዛ ሎሚ ዕለት ተጋዳላይ ጴጥሮስ ሰሎሞን ንስለያዊ መጽናዕቲ ፈንቅል ንሱን ኣባላቱን ኣበርክቶኦም እንታይ ከምዝነበረ ካብ ቃሎም  ኣይሰማዕናን፡፡ ልዕሊ ወዲ ሰለሞን ግን መን ክገልጾ ይግባእ? ስለ ምንታይ’ከ ወዲ ሰሎሞን ዘይገለጾ? ሕቶ ብዙሕ ተጋዳላይ ምዃኑ ርዱእ’ዩ፡፡ ኣብ ልዕሊ ዋጣ ዘውጣጥስ ኣይክዋጥን ከውጣጢ ኢዩ ነገሩ፡፡
ወዲ ሰሎሞን ግን ከም መዛንኡን ትሕቲኡን ብዛዕባ ፈንቅል ዘይተዛረበ ኮይኑ ዘይኮነስ፡ ህግደፍ ወዲ ሰለሞን ዝተዛረቦ ከቃልሖ ትብዓት ስለዘይብሉ ጥራሕ እዩ፡፡
ኣብ ጽባሕ ዓወት ስርሒት ፈንቅል በቶም ክሳብ ሎሚ ንጅግንነቶም ተዘንቲይሎም ዘይፈልጥ፡ ኣብ ጎኒ’ቲ ሰራሒ ታሪኽ ኣጋር ሰራዊትን ኣሃዱታት ከቢድ ብረት 74፡ ሃንደሳን ሓይሊ ባሕሪን  ካብ እግሩ ከይተረፉ ምስ ሙሉእ ዕጥቆም፡ ደረቕን ተንቀሳቐስን ካሜራታቶምን ንዕኡ ዝኸውን መቀያየሪ መሳርሒታቶምን ብምሽካም ሰኣልትን ተዋጋእትን (ተውለ) ኮይኖም ኣብ ውሽጢ ሃልሃልታ ኩናት እንዳሓንበሱ ህያው ዝኾነ ንቀጻሊ ወለዶታት ጅግንነት ኣያታቶምን ወለዶምን ዘውርስ ታሪኽ ዝሰነዱ ከም በዓል የውሃንስ ጆሽዋ ዝኣመሰሉ ምዑታት ጋዜጠኛታት ተጋደልቲ ህዝባዊ ግንባር ቅድሚ ዝኾነ መራሒ ንወዲ ሰለሞን ቃለ መጠይቕ ከምዝገበርሉ ይፈልጡ እዮም፡፡
መሬት ምስ ወግሐ ጽባሕ ንጉሆ ከኣ እቶም ብሂወት ዝተረፉ ክገልጽዎ እዮም፡፡ ኣይኮነን ከኣ ኣብቲ Research & Document Center (RDC) ተሰኒዱ ክርከብ’ዩ፡፡
ኣብ ታሪኽ ጅግንነት ተጋደልቲ ህዝባዊ ግንባርን ህዝቢ ኤርትራን ተሓቢኡ ዝነብር ዘሎ ጉጅለ ህግደፍ ንሓላፊ ስለያ 72 ነበር ኣህሲስዎ እዩ፡፡ ኣበርክቶ ወዲ ሰለሞን ኣብ ውድብ ህዝባዊ ግንባር ግን ካብ ሕልና ነፍስ ወከፍ ተጋዳላይ ዘይሕከኽ እዩ፡፡   ፕረዚዳንት ንመጋበርያታቱ “ወዲ ሰለሞን ካብ ዝኾነ መራኸቢ ብዙሃን መንግስቲ ኣርሕቕዎ” ኢሉ ከምዝኣገዶን በቲ ከም ሰቡ ንስግረ ዶብ ዝወጸ ዓሊ ዓብዱ ኣቢሉ ካብ ኣርካይቭ ሚኒስትሪ ዜና ከምዘሕከኾን ይፍለጥ፡፡
ብህዝብን ተጋደልትን ዝተሰርሐ ጅግንነት ገድሊ ኤርትራ በቲ ስልጣን ንበይኑ ብሒቱ ከም መሕብኢ በዓቲ ዝጥቀመሉ ዘሎ “ኣድሃ” ፕረዚዳንት ንወዲ ሰሎሞን ካብ ዓይኒ ህዝቢ ንምስዋር ናብ መራኸቢ ብዙሃን ከይቐርብ ምግባር ጥራይ ግን ኣይኮነን፡፡ ልዕሊ’ዚ ውሳነ’ዚ ኣብታ ንመበል 24 ዓመት ናጽነታ ተኽብር ዘላ ዞባ ሰ.ቀ.ባሕሪ (ሰምሃር) ብዘይ ዝኾነ ብይን ክሳብ’ዛ ዕለት እዚኣ ን12 ዓመት ምስ ብጾቱ ሓይርዎ ይርከብ፡፡
ስለዚ ሰምሃር!! ክልተ ተጻረርቲ ሚስጢራት ኣብ ከርሳ ዝሰተረት ኣውራጃ እያ፡፡ ብሓደ ወገን ምእንተኣ ዝተኸፍለ መስዋእትን ሳላኹም ሳላ’ዞም ደቀይ ብምባል እንዳስተንተነትን እንዳተሓበነትን ትዝክሮ ቅያ ጀጋኑ ደቃ፡ በቲ ካልእ ወገን ከኣ ነቲ ቅያ ታሪኽ ዝቐየሱን ዘጽንዑን ሰኒዶም ናብ ወለዶታት ዘመሓለለፉን ጀጋንኣ ን12 ዓመት ኣብ ከርሲ ዒራዒሮ ሰቲራ እንዳተቐንዘወት “እህ!” እንዳበለት  ትሓልፎ ኣላ፡፡
ካብ ኩሉ ንሰምሃር ዘጉሃየ ዋናታቱ ኣብ ዒራዒሮ ሸሚምካስ ኣብ ውዕሎ (ጓይላ) ብዘይነበሩ ኣብ ፈቖዶ ጽምብላት ሸነን ዝብሉ ንጓሂኣ ሰማይ ኣዕሪግዎ ይርከብ፡፡ ሓቂ እዩ ብምድግጋሙ ኣመና ፊግዕ ይብለካ፡ ምኽንያቱ ትማልስ ሕራይ ቅያ ተሰሪሑ፡ ብድሕሪኡ ኣብ ውሽጢ 24 ዓመቱ’ከ እንታይ ቅያ ተፈጺሙ? ዝብል ሕቶታት ዘልዕል እንተኾነ፡ ከም በዓል ውጩ፡ ቻይና፡ ወዲ ኢፍሬም፡ ነቐዘ፡ ኣዛዚ ብርጌድ ነበር ወዲ ዳኒኤል፡ ተወልደ ቀለታ፡ ኣውሊያይ፡ ካሪካሪ…ዝኣመሰሉ ኣብቲ ውዕሎ ዝወዓሉ  ምስክርነቶም እንተቕረቡስ የጥዕመሎም፡፡
እቲ ንሰብ ገሪምዎ ዘሎ ግና ናይ ወ/ሮ ጽጌሬዳን ኣቶ ኣልኣሚን መሓመድ ስዒድን ዓመት ዓመት ተዋሳእቲ ጽምብል በዓል ፈንቅልን ኣሳሰይቲ መድረኽን ዝኾንሉ ምኽንያት እዩ፡፡ ኣበይ ዝነበሩ’ዮም፡፡ ኣበይ ዝነበሩ: ክሻ፡ ወዲ ክሻ ማንኪ ወዲ ማንኪ???
ሰምሃር ሃየ ሓደራ!! ንኹሉ ከከም ገጹ ጽቡቕን ሕማቕን ታሪኽ ኣብ ከርስኺ ሰኒድኪ ንወለዶ ኣሰጋግርዮ፡፡ ብሓደ ወገን ነቶም ጨው ሳሊና ዝበልዖምን ንናይ መወዳእታ ምሕራርኪ ኩቡር መስዋእቲ ዝኸፈሉን ደቅኺ፡ ምእንታኺ ምዃኑ ኣሚንኪ ይንዋሕ ይሕጸር ብተፈጥራዊ ጸጋታትኪ ክትክሕስዮም ቃል እተውሎም፡፡  እንተ በቲ ሓደ ሸነኽ ድማ ነቲ ኣዕቒብክዮ ዘለኺ ኣዕጽምቲ ደቅኺ ኣብ ልዕሊ ምጥላሙ ዓመት ዓመት መሸቀጢ በላዕቲ ሕድሪ ምዃኑ ኣስተብህልሉ፡፡ ብዛዕባ መሕለፊ ግዜ ካልኣይ ቤቱ ጌሩኪ ንዘሎ ድማ ልቢ ይሃብኪ ካብ ምባል እንታይ ክብለኪ፡፡
ቃል እቶም ምእንቲ ኣንጻር ደመኛታትኪ ንናጽነት ተዋጊኦም ክቡር ሂወቶም ዝወፈዩ ይዓብር ኣሎ ብምባልን ልዕልና ሕግን ስልጣን ናብ ሓደስቲ ወለዶ ዘሰጋግር ምህናጽ ቅዋማዊ ስርዓትን ስለዝጠለቡ ጥራይ፡ እናረኣዩን እናሰምዑን ኣብ ከርስኺ ዝተሓየሩን፡ ነቶም ብሂወት ዘለው ክሳብ መዓልቶም ሓደራ ዓቅብዮም ብምባል እላበወኪ!!፡፡

ካብ ኣባል 72 ነበር ባጽዕ
07.02.2014

 ቀዳማይ ክፋል

                        ካብ  ፈጣሪኣስ  ፋሕጣሪኣ

ብዜካ እቶም ኣዒንቶም ዝዓወሩ ሕሉፋት ደገፍትን ምስ መላኺ መራሒ ጉጅለ ህግደፍ ኢሳይያስ ኣፈወርቂ ኣብ ደም ንጹሃት ኤርትራውያን ኢድ ዝመለሱ፡ ምስኡ ሞትና ምስኡ ጥፍኣትና ዝበሉ ገበነኛታት ገዲፍካ፡ ኣብዝሓ ህዝቢ ኤርትራ ቅልጡፍ ለውጢ ክመጽእን ክርእን ኣብ ክቱር ትጽቢትን ተስፋን ኢዩ ዘሎ፡፡ ነዚ ዓይነ ስዉር እውን ዳህሲሱ ዝፈልጦ ድሌት ህዝቢ ኤርትራ፡ ሎሚ ካብ ዝኾነ እዋን ንላዕሊ ንመላኺ ጉጅለ ህግደፍ ስግኣት ኮይንዎ ዘሎ ጉዳይ ኢዩ፡፡ ነዚ ኣብ ጥርዚ በጺሑ ዘሎ ቁጠዐን ነድርን ህዝቢ ኤርትራ ንምብራድ እዚ ቀታሊ ጉጅለ ዕድመ ስልጣኑ ከናውሕን ከምኣመሉ ብዘይ ጭበጥ መብጽዓ ንህዝቢ ከደናግርን ሎሚ እንታይ ይሰርሕ ኣሎ ናይ ኣደባባይ ሚስጢር ኢዩ፡፡

ህዝባዊ ኣኼባ ኣብ ውሽጢ እዚ ዝሓለፍናዮ ናይ ጸላም ዕስራን ሰለስተን ዓመታት ከም ሎሚ ብህግደፍ ኣይተሰርሓን ኣይበዘሐን፡፡ ይዋእዮም እቶም ንምስሊ ዝተቐመጡ ስማውያን ሚኒስተራትን ኣመሓደርትን ከማን ተዘኪሮምስ ኣብ መሳኹቲ ቲቪ ኤረ ጉጅለ ህግደፍ ክረኣዩን ክዛረቡን በቒዖም ኣለዉ፡፡ እቲ ኣብ ደገ ኣብ ድያስፖራ ንዝነብሩ ኤርትራውያን ኣሕዋት ንምድንጋር ጥራይ ተሓዚኡ ዝነበረ ኣኼባታት ሎሚ ኣብ ውሽጢ ዓዲ ንዝነብር ህዝቢ ነዛ ኮፍ ክብሉን ከዕርፉን እውን ትንፋስ ከሊእዎም ኣሎ፡፡ ኣብ ኩሉ ኩርንዓት ኤርትራ ናይ ኣምሰሉ ኣኼባታት ዝስመዓኩም ግለጹ፡ ተዛረቡ ህግደፍ ጽገናዊ ለውጢ ክገብርን ኣካይድኡ ከመዓራርን ንዝተፈጸሙ ጌጋታት ስጉምቲ ክወስድን ኢዩ፡ ብምባል ኣኼባ ሰሚናር ገምጋም ኮይኑ ኣሎ፡፡ ኣብታ ማዕከን ሓሶትን ግጭታት ከባብን ዓለምን ጥራይ እተቃልሕ  ትካል ህግደፍ ቲቪ ኤረ እኳ ንኽትሰምዖ ዘደንጹ መረረታት ህዝቢ ክስማዕ ተራእዩ ኣሎ፡፡ ክሳብ ብማይ ስሓ (ዝተዓሸገ ማይ) ሻህን ቡንን ነፍልሕ፡፡ ዋጓ ዝተዓሸገ ማይ ዘይንቡር ኣዝዩ ክባር ኮይኑ፡፡ ዝብሉ መረረታት ተሰሚዑ ኣሎ፡፡

ብመንጽሩ ኣብዚ ኢሳይያስ እሾኽ ዓጋም ክሓቁፍ እውን ዝፍትነሉ ዘሎ ናይ ዓቕሊ ጽበት ዕራርቦ ግዜ፡ ዕርቂ ምስ መንግስቲ ኢትዮጵያ እውን ንሰምዕን ይፍተንን ምህላዉ ናይ ኣደባባይ ሚስጢር ኢዩ፡፡ ንልዕሊ ዓሰርተው ኣርባዕተ ዓመታት ዶብ ከይተሓንጸጸ ኣይንላዘብን ኣይንረዳዳእን ክበሃል ከም ዘይጸነሐ፡ ሎሚ ኤርትራዊ መንእሰይ ኣብ በረኻታት ሲናይ ክትሰምዖ ብዘደንጹ ምስ ተሓርደ፡ ከም ኣቕሓ መሸጣ ኣብ ዕዳጋ ምስ ወረደ፡ ኣብ ማእከላይ ባሕሪ መላሲ ኣውያት ዘይብሉ ምስጠሓለ፡ ኣብ ምድረ ሰሃራ ምስተጋፈዐ፡ ኤርትራዊ እግሩ ናብ ዝመረሖ ምስ ተበታተነ፡ ኤርትራ ሓንቲ ዓባይ ቤት ማእሰርቲ ተቐይራ ህዝቢ ኣብ መዓሙቕ ድኽነት ምስ ተሸመመ፡  ኮር ተገልበጥ ክበሃል ንሰምዕ ኣለና፡፡ ስለምንታይ ኢዩ ሎሚ ኢሳይያስ ትፍኡ ክልሕስ ዝመጣጠር ዘሎ ኣጸቢቕና ክንርዳእን ክንፈልጥን ይግባኣና፡፡ ህግደፍ ኣብ ውሽጢ ይኹን ኣብ ደገ ተኻዒቡን ካብ ልቢ ህዝቢ ኤርትራን ወጺኡን ኢዩ፡፡ ስለ ዝኾነ ኣብ ኣፋፌት መቓብር ተገምጊሙ ክንሱ ቀባሪ ስለ ዝሰኣነ፡ ኣብ ቃሬዛ ተሰጢሑ ለኻኺሙና ክኸይድ ዝዓቕሙ ይፍትን ኣሎ፡፡ እታ ናይ መጠረሽታ ፈተነ ጉጅለ ኢሳይያስ እዚኣን ናይ መወዳእቱኡን ኢያ፡፡

መድረኽ መቐይሮ ለውጢ በጺሑ፡ በሲሉ ጥራይ ዘይኮነ ፈጋዕጋዕ ኣብ ዝበለሉ ህዝቢ ብማዕበል ክትንስእ፡ ሓንሳብን ንሓዋሩን ምልክን መለኽትን ሸውዓተ ሙዓሙቕ ደብዩ ሓርነቱ ከስተማቕር ለባምን መስተውዓልን ሕያዋይን ትርግታ ህዝቢ ዝሰምዕን ብግዝኣተ ሕጊ ዝቕየድን ወጃሂ ኣማእዛኒ ጓሶት ይደሊ ኣሎ፡፡ ዘሕዝነካ ግን ንፍትሕን ዲሞክራስን ንቃለስ ኣለና ኣብ ዝብሉ መራሕቲ ደምበ ተቓውሞ ትርግታ ልቢ ህዝቢ ኤርትራ ክሰምዑን ህዝቢ ዝደልዮ ነገራት ክገብሩን ዘይበቑዓትን ዘይኮኑን ምዃኖም ኢዮም፡፡ ብዘይ ቀልዓለም ኤርትራ ብዘይ ሕጋዊ መንግስን ብዘይ ቁርዑይ ደምበ ተቓውሞን ዝበሎ ጋዜጠኛ ኣማኑኤል ኢያሱ ሓቁ ኢዩ፡፡  ኣብ መገዲ ዲሞክራስያዊ ለውጢ ዘይኮኑ፡ ኣብ ሹኩሽኳ ጓል መገዲ ኣትዮም ዝገርዘሙ ምዃኖም ኢዮም፡፡ ድሕሪ ፍጻመ 21 ጥሪ 2013 ዝተራኣየ ማዕበላዊ ምልዕዓል መንእሰያት ክምህሮም ምተገበኦ፡፡ ድሕሪ ህልቂት ግዳያት ላምፓዱሳ ብውልቀ ተበግሶ ኣቦና ዶክተር ተወልደ ተስፋማርያም (ወዲ ባካሮ) ዝተራኣየ ምልዕዓላት ህዝቢ ዓይኖም ከንቁሑ ምተገበኦም፡፡ ደምበ ተቓውሞ ካብ ዝብገስ ከምዚ ዓይነት ብርኩት ተሳታፍነት ህዝቢ ዝተራኣዮ ህዝባዊ ምትእኽኻብ ክገብር ተራእዩ ኣይፈልጥን ኢዩ፡፡ ስለምንታይ ኢዩ ደምበ ተቊሞ ኣብ ልቢ ህዝቢ ዘየለ……? እቲ መልሲ ባዕሎም ሓቲቶም ባዕሎም መልሲ ክህብሉ ክገድፎ እየ፡፡ ገለ ትዕዝብተይ ግን ካብቲ ብዙሕ ቁንጣሮ ወስ ከብል፡፡

ከም ውልቀ ጀማሪ ጸሓፋይን ብዙሕ ነገራት ዝጎድለንን ኣብ ደምበ ተቓውሞ ዝርእዮም ዓንቀፍትን ሓለኽትን ብፍላጥ ዝግበሩ ጌጋታት ኣዝዮም ይገርሙንን የሰንብዱንን ኢዮም፡፡ ሓደ ሓደ ግዜ ብዛዕባ እታ ዕትብትና ዝተቐብራ፡ ዝዓበናላን ደምናን ረሃጽናን ዝኸፈልናላ፡ ኣብ ቀርኒ ኣፍሪቃ እትርከብ ቀይሕ ባሕሪ ዝሕላገታ ኤርትራ ድዮም ዝዛረቡ ዘለዉስ፡ ዋላስ ንሕና ዘይንፈልጣ ኣብ ካልእ ፕላኔት ትርከብ ኤርትራ ኢያ ክትብል ዘድፍረካ ኢዩ፡፡ እታ ንሕና ንፈልጣ ኤርትራን እቲ ንሕና ንፈልጦ ህዝብን ምስቲ ገለ ኣብ ደምበ ተቓውሞ ተጠርኒፈን ዘለዋ ውድባት ኤርትራ ዝብልኦ ፍጹም ዘይኮነን ዘይሳነን ኣብ ባይታ ዘየለን ነገር ኢዩ፡፡ ሕጂ ውን ክደግመሎም እቲ ንሶም ዝብልዎን ህዝቢ ዝደልዮ ዘሎን ብሓደ የለን፡፡

ህዝቢ ኤርትራ መንዩ…? እንታይʼዩ ዝደሊ ዘሎ ርሑቕ ከይከድና ፍጻመ 21 ጥሪ 2013፡ ኣብ ከተማ ሮማ ኢጣልያ ቁጠዐ ህልቂት ላምባዱሳ ዘስዓቦ ማዕበላዊ ሰላማዊ ሰልፊ፡ ብኣቦና ዶክተር ተወልደ ተስፋማርያም (ወዲ ባካሮ) ዝተገብረ ተበግሶን ዝተራኣየ ግብረ መልስን ደጊሞም ክርእይዎን ክመሃሩሉን ከዘኻኽሮም ይደሊ፡፡ እዚ ህዝቢ እዚʼዩ ኣብ ኤርትራ ዲሞክራስያዊ ለውጢ ክምጽእ ብሂወቱ ብግልበቱ ብገንዘቡ መስዋእቲ ዝኸፍል ዘሎ፡፡ ኣብ ሕድሕዱ ክደጋገፍን ሓድነት ሓይሊʼዩ ክብልን ብትሪ ንጉጅለ ህግደፍ ክቃወምን እምበር ክገዳዳዕ ክፈላለ ኣይተራኣየን፡፡ ግድን እንተዘይ ተፈላሊኻ ረብሓ ውልቅና ኣብ ምፍልላይካ ኢዩ፡ ዝብሉ መራሕቲ ደምበ ተቓውሞ ኤርትራ ክትርኢ ዘሕዝን ኢዩ፡፡ ካብቶም ቃልሲ ክንመርሕ ዲሞክራስያዊ ለውጢ ከነረጋግጽ ንቃለስ ኣለና ዝብሉ ገለ መራሕቲ ውድባት ህዝቢ ካብኦም ንላዕሊ ነቒሑ እንታይ ከም ዘዋጽኦን ፈሊጡን ምህላዉ ዝዘንግዑ ይመስሉ፡፡ ኩነታት ኣብ ስደት ዝርከቡ መራሕቲ ደምበ ተቓውሞ ኤርትራ ካብ ፈጣሪኣስ ፋሕጣሪኣ ኮይኑ ብዘይ ዝኾነ መቐይሮ ሕጂ እውን ይኸይድ ኣሎ፡፡ ኣብ ክንዲ ህዝብን ሃገርን ንምድሓን ህጹጽ መልስን ስጉምትን ኣብ ልዕሊ ቀታሊ ጉጅለ ህግደፍ ዝወስድ፡ ፍልልያቱ ኣወጊዱ በቲ ከሰማምዖ ዝኽእል ነገራት ብሓደ ሰሚሩ ኣድማዒ ስራሕ ዝሰርሕ ንፋሕጣሪ ህዝቢ ኤርትራ ዝኾነ ኢሳይያስን ጉጅለ ህግደፍን ኢዩ መድሎ ዝኸውን ዘሎ፡፡

ይ…..ቕ……ጽ…..ል……

እዚ ጽሑፍ ውልቃዊ ርእይቶን ትዕዝብትን ናይ ጸሓፊኡ ኢዩ!

ሚኪኤል እምባየ (ኣራንቺ)

[email protected]

ንኹሎም ደለይቲ ፍትሒ ኤርትራውያን ኣብ ከተማ ስያትልን ከባቢኣን ዝተጸውዔ ኣገዳሲ ህዝባዊ ሰሚናር ቀዳም ዕለት 2 የካቲት2014 ተኻይዱ። ሰሚናር ብቀንዱ ነቲ ብጊዝያዊት ኣካያዲት ሽማግለ ንሓድነትን ድሕነትን ኤርትራ ዝነደፈቶ ሰነድ ናብ ህዝቢ ቀሪቡ ርእይትኡ ከንብረሉን ሓሳባቱ ክውስኸሉን ዝዓለመ ኢዩ ነይዩ።

Public Seminar Held in Seattle February 1-2014