By

ሰብ ጋዕሲ!
ረድኢ መሓሪ /ኣለና/ ሓምለ 14-14

እነሆ እጹብ ድንቂ! ‘ንሕናማቕ ዘመንሲ በዓል ጋዕሳ’ለዋ!’ እዞም ሰብ ጋዕሲ እዚኣቶም ኤርትራን ህዝባን ንምጽናት ዝተዘርኡ ዘርኢ ዳንዴር ኢዮም። ከምዚ ናይ ኤርትራ ዝመሳሰል ግርንቢጥ ኣይተራእየን። ኣብ መሬት ኤርትራ ብድሕሪ እቲ ክቡር ዋጋ ዝተኸፍሎ ናጽነት መን’ዩ ብመንነቱን ታሪኹን ክሕበን ዝግበኦ ዝነበረ? ከምቲ ‘ንተከዘ ኣነ ዝደልያ ብሕምብርቲ፡ ንሳ ዝመጸትኒ ብቅርቅርቲ’ ዝበሎ በዓል ተከዘ፣ ንሕና ዝተጸበና፡ ሓርነትን ፍትሒን፤ ሰብ ጋዕሲ ዝፈደዩና ግን ስደትን ሞትን! እዛ ምድረ-ሰማእታት ሰብ ጋዕሲ ረኺባ፣ ሕማቕ ዘመን ኣጋጢሙ።

እቶም ንውድብ ህዝባዊ ግንባር ሓርነት ኤርትራ መሪሖም ናብ ናጽነት ዝኣተዉ ገዳይም ተጋደልቲ፡ ፖለቲካዊ ስልጣን ናብ ህዝቢ ነሰጋግር፡ ብሕጊን ቅዋምን ንማእዘዝ፡ ሕጊ ይንገስ ዝበሉ ደቀባት ንኣራዊት’ኳ ዘይትምነዮ ሕሰም ተፈድዮም ንሓዋሩ ጠፊኦም ኢዮም። ሽዑ ንሽዑ ድማ እቶም ኣብ ትሕቲ ሕቑፊ ኢሳይያስ ኣብ ምምስራት ህግደፍ ዝተጨጭሑ ጨቓዊት ኣትማን የማነ ማንከይን ሓጎስ ክሻን ንሙሉእ ቁጠባዊን ፖለቲካዊን ባይታ ኤርትራ ገበትዎ።

ብድሕሪ ምእሳር ሚኒስተራት፡ ምድስካል ብዙሓት ተጋደልቲ ሰዓበ። ብድሕሪ ምድስካል’ውን ማእሰርቲን ብዝተፈላለየ ኣገባባት ቅንጸላን ክሳብ ሎሚ ይቕጽል ኣሎ። ምድስካል፡ ኣብ ዘመነ ሰብ ጋዕሲ ዝተራእየ ፍልስፍና ኢዩ። ኣብ ዘመነ ህግደፍ ንሃገርን ህዝቢን ዝሓሊ ሓላፊ የድሊ ኣይነበረን። ድሕሪ ምድስካል ናይ ገዳይም ሓለፍቲ፣ ካብ 1999፣ ብፍላይ ድማ ድሕሪ 2001 ኣብ ኩሉ ምምሕዳራትን መንግስታዊ መሳርዕን ህግደፍ ዝበላ ከም ፓፓጋሎ ክደግሙ ዝውዕሉ መልሚሎምን መምዮምን መልእዎም። እምባትካላን ናቕፋን ከኣ መመልመሊ ካድረታት ህግደፍ ኮና። ሎሚ ኣብ ዝኾነ ቤት ጽሕፈት ንህዝቢ ሓቀኛ ፍታሕ ዝገብር ሓላፊ ይድለ የሎን። ንህዝቢ ፍታሕ ክግበር ስለዘይተደልየ፡ ሎሚ ኣብ ኤርትራ ኩሉ ነገር የለን።

ሕማቕ ዘመን በዓል ጋዕሳ’ለዋ! ፈላሚ ዘርኢ ክርዳድ ኢሳይያስን ላዕለዎት ሓለፍቲ ህግደፍን ኣብ ወሳኒ መንግስታዊ ሓላፍነት፣ ከምኡ እውን ኣብ መብዛሕትኡ መንግስታዊ ጽፍሕታት፡ ኣብ ውሽጢ ሃገር ይኹን ናብ ወጻኢ ሃገራት ብዝለዓለ ሓላፍነት ሰባት ንምምዳብ ዝጥቀሙሉ ቀንዲ ረቛሒታት፦ መበቆል ትውልዲ ኢዩ። ኤርትራዊ ዓሻ! ከምቲ ውሕጅ እናሰሓቕካ ኢዩ ዝወስድ ዝበሃል፣ እናሰሓቕካን ኣብ ልዕሊ ሬሳታት ደቅኻ እናሳዕሳዕካን ሰብ ጋዕሲ ናብ ቃሕ ዝበሎም መሮር ወሲዶም ከጥፍኡኻ ኢዮም ዝሰርሑ ዘሎ’ሞ ኣዒንትኻ ክፈት።

ስለዚ ካብዚ ስትራተጂ’ዚ ብምብጋስ ኣመራርጻ ህግደፍ፡ ናይቲ ናብ ሓላፍነት ዝመጽእ ሰብ፣ ናይ ግድን ናይ መንነት ቅልውላው ወይ ስክፍታ ዘለዎ ንክኸውን ይምረጽ። (ናይቲ ኣቐዲሙ ዝረሰነ እምኒ ብርኩታ፡ ሎሚ ብርኩታ ደምህት ክብርኮት ምርኣይ’ምበኣር ከም ዋዛ ዝቦቐለ፡ ተኽሊ ደምበ ኣይኮነን። እዛ ብርኩታ ኣብ ውሽጣ እምኒ ኣላታ!) እዚ ብዙሓት ከም ሕፍረት ዝርእዩዎ’ኳ እንተኾኑ፡ ከም ጸሓይ ጾመ-ኣርብዓ በጣዕጣዕ ዝበለ ሓቂ ኢዩ። እቶም ንሓላፍነት ዝተመርጹ ሰባት ከኣ ኣብቲ ዝወሃቦም ቦታ ገበርትን ሓደግትን ናይ ምዃን መሰል ይረኽቡ። እዚ ከምዚ ዓይነት ኣመድድባ ብፍላይ ካብ ምእሳር ጉጅለ 15 ብጋህዲ ተራእዩ ኢዩ።

ኣብ ግዜ ብረታዊ ቃልሲ ድኹም ጎድንታት ዝነበሮም ሰባት ናብ ሕጸ ንሓላፍነት ይቀርቡ ኢዮም። ኣብ ኲናት ክፈርሑ ብሰባት ዝተራእዩ፣ ብዝነበሮም ድኻም ዝተፈላለየ ጌጋታት ተኣሲሮም ዝነበሩ፡ ኣብ ሜዳን ብድሕሪ ናጽነትን ብኢሳይያስ ዝተጸፍዑ፣ ወ.ዘ.ተ…ደቂቕ መጽናዕቲ እናተገብረ ናብ ሓላፍነት ደየቡ። ምኽንያቱ እቶም ከምዚኣቶም ዝኣመሰሉ ሰባት ርእሰ-ምትእምማን ኣጥፊኦም ስለዝነበሩ፣ ኣብ ሰብ ጋዕሲ ዝነገሱሉ ሕማቕ ዘመን ምእዙዛት ኮይኖም ከም ዝኸዱ ተጸኒዑ ነበረ። ናብ ብልሽዉና ቀልጡፎም ክኣትዉ ዝኽእሉ ስሱዓት፣ ወይ ኣቐዲሞም ኣትዮም ዝነበሩ’ሞ ማእሰርቲ ወይ ምድስካል ኢሳይያስ ዝቐመሱ።

ብህርፋን ገንዘብ ከምባሁቑ ዝሓድሩ፡ ሓለፍቲ ንክኾኑ ይድለ። በዚ ከኣ ኣብቲ ሓቢርና ንብላዕ ዝበሃለሉ ዘሎ ግዜ ሰብ ጋዕሲ፣ ሓቢሮም ይበልዑ። ንምእላይ ኣብ ዝድለየሉ ድማ፣ ብብልሽውና ኣመኽንዮም ከውርድዎም ስለዝኽእሉ፤ ብዓይኒ ኢሳይያስ ምቹእ ሕርያ ተገብረሎም። ርእሰ-ተኣማንነት ዘይብሎም፣ ዝተባህሎም ጥራይ ዝገብሩ፣ ብዛዕባ ከብዶም ጥራይ ዝሓስቡ፡ ጉዳይ ህዝቢ ናብ ጉድጓድ ይእቶ ዘይግድሶም፣ ምእዙዛትን እሺ በሃልትን ሰባት ንክኾኑ ደቂቕ ገምጋም ተገብረ። ከምቲ ‘ኣፍንጫ እንተተሃርመት ዓይኒ ትነብዕ’ ዝበሃል፡ ህዝቡ ክሳቐን ክዕመጽን ብሕልና ትም ዘይብል ኤርትራዊ፡ ህዝበይ ኣይበደል ዝብል ወደባት፡ በብግዚኡ ካብ ሃገር ከም ዝባረር ተገብረ።

ኣመራርጻ ሰብ ጋዕሲ፡ ናይ ቀረባ ዘመድ ላዕለዎት ሓለፍቲ ህግደፍ ወይ ዘመድ ኣንስቲ ሓለፍቲ ህግደፍ ንክኾኑ ሓያለይ መጽናዕቲ ይግበረሎም ነበረ። መሰል ብሄራት፣ ሃይማኖታት ወይ መሰል ደቀንስትዮ ዝተሓለወ ንምምሳል፣ ምንም እንዶ ምምሕዳርን ተቐባልነትን ዘይብሎምን ዘይብለንን ሰባት ናብ ዝለዓለ ሓላፍነትን መዝነትን ምምዳብ ሓደ ካብቲ ሰብ ጋዕሲ ዝወጠንዎ ፕላን ኢዩ። ክሳብ ዝደልዎም ክጥቀሙሎም ዝደልዩ ፈላጣትን ምሁራትን በብመልክዖም ምሓዝ። ምስ ተጠቕሙሎም ከም ዲስፖሳብል ሲሪንጋ ምድርባይ ሓደ ካብ ጸወታ ገበጣ ሰብ ጋዕሲ ኢዩ።

ናይ ምሕሳው፣ ሰባት ምውቓዕ፡ ወረን ቤላቤለውን ምብታንን ናይ ፕሮፓጋንዳ ክእለት ዘለዎምን፣ እዞም ሰባት እዚኣቶም ድማ ኣብ ህዝቢ ኤርትራ ምፍልላይን ምጉጅጃልን ንምፍጣር ናይ ክፍኣት ተዋሳእቲ ስለዝኾኑ ኣብ ቅድሚ ሰብ ጋዕሲ ቅቡላት ኢዮም። ኣዝዮም ጨካናት፡ ወይ ቀንጸልቲ ንክኾኑ ባህርያቶም ዝተፈልጠ፤ ደቂቕ ሕርያ ይግበረሎም ነበረ።

ሰብ ጋዕሲ፡ ኣብ ዘመኖም ካብ መዝገብ ዝሓኸኽዎም ዓበይቲ ጉዳያት፤

ካብ ግዜ ናጽነት ክሳብ ሎሚ /ክፍላ 2014/ መብጽዓ ዝተገብረሎምን ዝተረስዑን ጉዳያት ጸብጺብካ ዝውድኡ ኣይኮኑን። ብጥውይዋይ ልቢ ዝምራሕ መንግስቲ ህግደፍ፣ መንግስቲ ሓሶትን ምትላልን ኢዩ። ትማሊ ዝተባህለ ሎሚ ዝርስዕ ህዝቢ ብምርካቡ ከኣ ዕድለኛ ገበሮ። ጉዳይ እስትሕጋግ ተጋደልቲ፤ /እቲ ብ1993 ዝተኣወጀ ኣነዋሪ ጉዳይ እስትሕጋግ ማለት ሂወቱ ንዝኸፍል ሓደ ተጋዳላይ 1 ዶላር ንመዓልቲ ኢዩ ተባሂሉ ዝነበረ። ካብ በሃሊኡስ ደጋሚኡ ከም ዝበሃል ከኣ፣ ንክደግሞ’ውን ስኽፍ-ክፍ ዘብል ካሕሳ ኢዩ።

ኣብቲ ንምእማኑ ዘጸግም ዘመን-ጊንጢነት ሂወቱ ዝኸፍል ዝነበረ ኤርትራዊ፣ ንመዓልቲ $1 ኢኻ ትኽፈል ማለት፤ ልዕሊ ርእሲ ዝደየበ ንዕቀት ጥራይ ኢዩ ነይሩ። እቲ ካብ ኩሉ ማሕበራዊ ቀጸላታት፣ ሃይማኖታት፣ ብሄራትን ብዝተፈላለየ ዕድመን ጾታን ዝተዛነቐ፤ ንነፍሱ ረሲዑ ከም ደመ-ዎ ስጋሁ ዝተቐበለ ባሕታዊ ዝመስል፣ ስለ ሃገሩን ህዝቡን ቆራቢን ሰጋዲን ተጋዳላይ፡ ማዕረ ሓደ ጊልያ ዝሰርሖ’ውን ንክኽፈል ዕድል ኣይረኸበን።

ሽዑ ይዋእ! ተጋዳላይ ካልኩለተር ገይሩ ከርብሕ ይውዕል ነበረ። 15 ዓመታት ዝተጋደለ ሰብ ብ 365 መዓልታት ምስ ኣርብሖ፣ ብሕሳብ ንመዓልቲ ከኣ ብሓደ ዶላር ምስ ናይ ሽዑ ምጣነ-ሸርፊ ብ7.2 ገይሩ ሕሳቡ 39,420 ብር ይኾነለይ ኢሉ ኣንባሃቘ። መስደምም’ዩ! ሰብ ጋዕሲ ኣብቲ ግዜ’ቲ መኽፈሊ ጋር ነፍሲ ኣስታት 70 ሽሕ በጺሑ ኣብ ዝነበረሉ ግዜ፣ ደበስ ንስድራ ቤት ስዉኣት ግን 10 ሽሕ ጥራይ ንክኸውን ተኣወጀ። ወላ እቲ ድሩት መብጽዓ ግን ኣይተረኽበን። በዚ ምኽንያት እዚ ከኣ ጉጅለ 15 ኣብ 2001 ዘይኮኑስ፡ ኣቐዲሞም ተእእሲሮም ከም ዝነበሩ ኢዩ ዝበርህ ዘሎ።

ብድሕሪ ኣድማ ተጋደልቲ ብዝተገብረ ምእሳርን በብቑሩብ ብዝሰዓበ ምብትታን ህ.ግ.ሓ.ኤርትራን ምእሳር ገዳይም መሪሕነት፣ ምስራት ኣስካሕካሒ ውልቀ-ምልኪን ፋሕ-ጭንግራሕ ህዝቢን ምስ ሰዓበ፣ ጉዳይ ስትሕጋግን ደበስን ከም ሕማም ሕርሲ ተረሲዑ ተረፈ። እምበኣርከስ እቲ ብሰበብ ባድመ ዝተወልዐ ኲናት፣ ሰብ ጋዕሲ ደቀባት ንምእሳር ካብ ዓቕሊ ጽበት ዝወጽኡሉ ብልሂ ስልቲ መሲሉ ስለዝተራእዮ ኢዮም ወሊዖምዎ። ግን እቲ ብምብራዕ ኲናት ባድመ ዝበሰለ ቅጫ ዘይኮነስ፣ ብግልባጡ ኳዂቶ ደኣ ኮነ። እነሆ መንበረ-ስልጣን ሰብ ጋዕሲ፣ ብሰንኪ እቲ ጥውይዋይ ልቦም፣ ናብ ዋዜማ ዘመነ-ቅብጸቶም ንክበጽሑ ተቓሪቦም ኣለዉ።

እቲ ካብ እስትሕጋግ ክመጽእ ዝግብኦ ገንዘብ፣ ክልተ-ሰለስተ ላዕለዎት ሓለፍቲ ህግደፍ ኣብ ሓደ ምሸት ዝሕሽሽዎ ብሉ ለበል ኢዩ። ናብ ካዝና ኢሳይያስ ዝኣቱ’ምበር ካብ ሕሳባቱ ዝወጽእ ገንዘብ የለን። ስለዚ ብጠንቂ ኲናት ባድመ፣ ከምቲ ሰስግኡ ንዓና፣ ዓዓጽሙ ንከልቢ እንዳ ጎይታና ዝበሃል ጽውጽዋይ፤ ላዕለዎት ሓለፍቲ ህግደፍ ሰስግኡ ንዕኦም፣ ዓዓጽሙ ድማ ንህዝቢ ኤርትራ ኮነ።

ጉዳይ መሬት ንተጣየስቲን ግቡኦም ዝፈጸሙ ኣባላት ሃገራዊ ኣገልግሎትን፤ /ተጣያሳይ ተጋዳላይ ወይ ዋርሳይ ኣብ ዝመረጾ ኣከባቢ መሬት ክወሃብ ተባሂሉ ነበረ። ዝተገብረ ፍታሕ ግና የለን።/ እቲ ምእንቲ መሬት ዝተጋደለ ዜጋ ኣንኳይዶ መሬትሲ፣ ገዛ ክራይ’ውን ኣብ ዘይረኽበሉ ሰዓት ኢዩ ዝበጽሐ። እቲ ብስም ሃገራዊ ኣገልግሎት ን18 ኣዋርሕ ተባሂሉ ዝተኣወጀ ወፍሪ ሳዋ፡ ክሳብ ሎሚ ፍታሕ ኣይረኸበን።

እቲ ካብ 1961 ዓ.ም. ኣትሒዙ ምእንቲ መሬት ክብል ዕድመኡ ንናጽነት ዝወፈየ ተጋዳላይን ኣባላት ሓፋሽ ውድባትን፣ ድሕሪ ናጽነት ገንዘቡ ከፊሉ ዝነብረሉ መሳፍሒ ዘይኮነስ፤ መኾርመዪ’ውን ተነፍጎ። ካብ በዓል ጣፍ፣ በዓል ኣፍ ከም ዝተባህለ፣ ሰብ ማዕረግን ሰብ ሽጉጥን ከከም ሓይልኻ ኮይኑ፣ ኣሎ ዝበሃል ጸጽቡቕ ኣባይቲ፣ ንነበርቲ ህዝቢ ናብ ጎደና እናጎሓፉ ባዕላቶም ሰፈርዎ።

ሕቶ መንበሪ ገዛ ንስንኩላን፤ ኣይተተግበረን። “ሕንቃቐ በዚሑ… ጨለ ዘረባታት!‘’ ኢሎም እንዶ ግዳ ሰብ ጋዕሲ፣ ናይ መወዳእታ ደበስ ስድራ ቤት ናይ ሜዳ ስውኣት፤ ብዓቢ ክንክን ዘዕበይዎም ደቆም ዝሰኣኑ ወለዲ ብላግጺ ተጨፍጨፉ። ካብ ሓደ ገዛ ክልተ፣ ሰለስተን ኣርባዕተን ዝተሰውኡን ኣጸቢቖም ዝበተኹን ወለዲ፣ ቁሊሕ ዝብሎም መንግስቲ ተሳእነ። ደበስ ስድራ ቤት ስውኣት ዋርሳይ፤ ኣብቲ ብዕንደራ ሰብ ጋዕሲ ዝተወልዐ ኣስካሕካሒ ኲናት ባድመ፣ ናይ ዝወደቑ ደቂ ኤርትራ ደበስ’ውን ከምቲ ቀዳማይ መጻወቲ ኮነ። እቲ ጥውይዋይ ልቢ መመሊሱ እናተጠምዘዘ፣ መን ቃል ይዛረብ!

ናይ 30 ዓመታት ናይ ኲናት ካሕሳ ካብ መንግስቲ ኢትዮጵያ፣ ከምኡ’ውን ካሕሳ ካብቶም ቀዳሞት ገዛእቲ ኤርትራ ዝነበሩ መንግስታት ምሕታት ግቡእ ኢዩ። እንተኾነ ግን ሰብ ጋዕሲ ብወግዒ ተሓቲቶም ንጉዳይ ካሕሳ ኣንይሓትትን ኢና ኢሎም ከም ዝነበሩ ዚዝከር ኢዩ። ብድሕሪኡ ንክሕተት ዝደረኸ መራሒ ኣይነበረን። እነሆ ከኣ ሎሚ ከም ርሱዕ ጉዳይ ተወሲዱ ናብ ናይ ታሪኽ ጉሓፍ ተደርብዩ ከም ዝተርፍ ተገብረ። ኣንታ ብሓበላ ዝተሸፈንካ ዜጋ፡ ሕጂ ማጨሎት ተሓጸብ።

ሕማቕ ዘመን በዓል ጋዕሳ’ለዋ! ዝበሃል እምበኣር ብልክዕ ናባና ዝወረደ ጥሚቕ ኢዩ። ኣንታ ህዝቢ! ካብዚ ናጤባ’ዚ ንምግልጋል ክልተ ግዜ ሕሰብ!! ስለዚ ኣብ ምስትውዓል ዘድልዮ ግዜ ኢና ዘለና። መስሓቕ ሸራፋት ከይንኸውንሲ፡ ብኣውራጃ፡ ሃይማኖት፡ ጀብሃን ሻዕብያን፡ ብባንዴራ፡ ብደርፊ ባእሲን ጽልኢን ይኣክል። መሬት ዓደቦኻ ደምህት ይጻወቱሉ፡ ኣዋልድ ሃገርካ ብደምህት ይዕመጻን ይነብዓን፡ ህዝብኻ ብሓለንጊ ጥሜት እናተገርፈ፡ ኣባላት ደምህት ዝስውዱሉ ዘለዉ፡ ኣብ ፖለቲካ ኤርትራ ገበርትን ሓደግትን ንምዃን ዝሕጸዩሉ ዘለዉ ግዜ ምዃኑ ኣስተውዒልካ ኩሉ ደናጉላና ናብ ሰብ ጋዕሲ ይወርወር። ኣንታ ኣብ ውሽጢ ኤርትራ ዘለኻ ሰብ፡ ኣንታ ኣብ ውሽጢ ሃገር ሰናድር ዝተቐነትካ ዜጋ፡ ክሻፋኻ ናብ ሰብ ጋዕሲ ኣነጻጽራ። ሰኣን ብትኽ፡ ከይንበትኽ፤ ሎሚ ብተኽ ወዲ መሬት።

‘ውጽኣ መባልዕቲ፡ እተዋ መናብዕቲ’ እቶም ብሓባር ንኤርትራ ስጋኣን ዓጽማን ዝምንጭትዋ ዘለዉ ሰብ ጋዕሲ ንክወጹ፡ ንሕና እቶም መናብዕትኻ ድማ ንክንኣቱ፡ እወ ሎሚ ብተኽ ኣርሓ!

ሰማእታትና ማዕረ’ቲ ንሞት ብትብዓት ዝተቐበልዎ፡ ንሕና ከኣ ሕልፈቶም ብኒሕ ንደብሶ!

ዓወት ንህዝቢ ኤርትራ!

መጋርጃ ይቀንጠጥ 33
ቦሎኛ!!!! ቦሎኛ!!!! ቦሎኛ!!!!!
ከተማ ናይ ኢጣልያ!!!! ቦሎኛ!!!!!!!!!!!!!!!

ቦሎኛ!!!መቓብር ወጻዕተኛ!!!!
ብሰብዓታት!! ነበረ ኣኼባታት!!!ቦሎኛ
ቃልሲ ክስስን!! ክድገፍ ንሓርበኛ
ዓቢ ምስ ንእሽቶ! ዝነብር ኣብ ወጻእተኛ
ኣገልገልት መራኻቢት ንዝነበረ ስደተኛ።

ቦሎኛ እንክጅምር ዘይጠዓየ!!
እከይነቱ ከም ዉሕጅ ዛረየ
ኣጸለምትን!! ጎሓላሉን!! ኣታተየ
ንደለይቲ ሓቂ ሃገር ዘጋገየ
ንኽንደይውን!! ስም ሰባት ኣዕነየ!!
ኣብ ጥልምትን!! ምትላልን!! ዝዘንበየ
ንኣሻሓትን!!ንብዙሓት!! ዜጋታት ዘንደየ
ንየዋሃት!!ወርቅን ዘሚቱ!! ደመን!! ዝሰተየ!!
ቀጸለ ዓመጻ!!ድሕሪ ነጻነት ንብረት ራሰየ።

ቦሎኛ!!!! ቦሎኛ!!!!ዝተገበረላ ተስፋ
ነበረት መራኸቢት ንተጋዳይን ብሃፋ
መስኮት ናይ ቃልሲ ትጽቢታ ብዓጸፋ
ድሕሪ ነጻነት ተረሲዓ በኒና ሃቲፋ
ጠፍኤት ንዓመታት!! ተቐልቀለት!! ሎሚ ተወቲፋ
ሓቅነት ዘይብሉ ስርሒት ዓዘፍዘፋ
ዉድቀት ህግደፍ ከተርእየና ደጋጊፋ
ሰማእታት ላምባዱሳ ኣቃልሔት ብዓጻጺፋ።
ቦሎኛ!!! ቦሎኛ!!!! መርዘን ደርጊ
ንደርጊ ኣእተኽሉ ሕንፍሽፍሽን ዘርጊ
ኣኼባኺ ኮይንዎ ተወርዋሪ ዘንጊ
ተጋዳላይ!! ቆርመዶ ብመድፍዕ ብሓለንጊ
ተሳዕረ!!ተማረኸ!!! ተሰደ!!! ሰርዊት ደርጊ
እንታይሞ!! ዝገደደ ነገሰ!! ኣብ ዓዲ ሕጊ።

ቦሎኛ!!! ቦሎኛ!!! ቦሎኛ!!ኣበሳሪት ጽንዓት
መንእሰይ ኤርትራ ተኣከበ ካብ ኩሉ ኩርንዓት
ኣብ ፕያሳ ማርጆረ!! ተሰሊፉ ኣብ ቅርዓት
ኣጋለጾም ንማፍያ ህግደፍ ዞም!! ነውራማት
ህዝቢ ቦሎኛ ደንገጸ ምስ ርኣየ ብዙሕ!!ንብዓት!!
ነገረሎም ንዓለም!! ኣውያት ናይ ዉጽዓት!!!
ኣብ ቫቲካንውን በጽሔ ኣውያት ኮነ!! ንብዓት።

 
ህግደፍ ፍሽለቱ ምስ ሰምዔ
መብራህቲ ኣብ ኤርትራ ኣብቅዔ
ቃልሲ መንእሰይ ለምለመ ጠጥዔ
ህዝቢ ተሓጎሰ!! ደጋጊሙ ኣጣቕዔ።

ቦሎኛ!! ቦሎኛ!!! ኣብሳሪት ጅግነትና
ፍናን ሃብዮም ጋንታ ስመር መንእሰይና
ዝሓሰብዎ ከምዝፍጽሙ ደጊምና ርኤና
ህዝቢ!! ከልካሊ ከምዘይብሉ ተዓዚብና
እንተድ ኣ!! ኣጥፊእናዮ!! ፍርሒ ካብ ቅድሜና
ክቕልጥፍ እዩ!! ጉዕዞ!! ንሃገርና!!!
የማነጸጋም!! ቁሊሕ!! ምሊሕ!! እናበልና!!
ክንምለስ ኩላትና ንዓድና!!ክንፍጽም ትምኒትና
ፍትሕን!! ስርዓትን!! ክንተክል ኣብ ሃገርና።

ቦሎኛ!!ቦሎኛ!!! ደጋጊምኪ ኣርዕድዮም
ዓመጽቲ ግዜኦም ከምዘብቅዔ ንገርዮም
ህዝቢ ከምዝተቐየም ኣብሪህኪ ኣስምዕዮም
ደው በለለይ ክብለጸልካ ከም ዘኽተመ ኣርእይዮም
ይኣክል!! ይኣክል!! ይኣክል!!!ከም ዝበለ ይረዳኣዮም
ጽሓይ ፍትሕን!! ስርዓትን ወገግ ከምዝበል ኣርድእዮም።

ዉድቀት ንማፍያ ህግደፍ!!
ፍትሕን ስርዓትን ይንገስ!!!

ሃይለ ገብረትንሳኤ
ኢንድያናፖሊስ ኢንድያና 13 ሓምለ 2014

መዋእል መብራህቱ፡ መልህቅ ኤርትራውነት!
ሃብተማርያም ኣብራሃ
ሎንዶን-ዓዲ እንግሊዝ 12 ሓምለ 2014

ሰብ ኣብዛ ዓለም ነባሪ ኣይኮነን። ኩሉ በብጽሕፍቶኡ ይሓልፍ ኢዩ። እገለ ዓሪፉ ኣብ ዝበሃለሉ እዋን ግን፡ ገለ ታሪኽ ወይ ውዕሎ ንምዝካር፣ ዝን ምባል ልሙድ ኢዩ። ቅድሚ ሒደት ሳምንታት መርድእ እቲ ሃገራዊ መልህቅ ኤርትራውነት ዝነበረ ነፍስ-ሄር መዋእል መብራህቱ ተሰሚዑ። ቅድሚ ኩሉ ንዕኡ ኣምላኽ መንግስተ-ሰማያት፡ ንስድራ ቤቱን ፈተውቱን ከኣ ጽንዓት ይሃቦም። ተኻፋላይ ረዚን ሓዘን ምዃነይ ከኣ በዚ ኣጋጣሚ እዚ ክሕብር እፈቱ።

ሓደ ካብቶም ኤርትራ ዘፍረየቶም ብሉጻት ሃገራውያን ዝነበረ መዋእል፡ ጠሊ ይሕደግ። ንሱ ኣብ ግዜኡ ዝገበሮ ሃገራዊ ተወፋይነት ብዙሕ’ኳ እንተነበረ፡ ገለ ንእሽቶ ታሪኽ ነዚ ወለዶ እዚ ክንገር ዘለዎ ጉዳይ እንተሎ ግን፡ ትብዓትን ጅግንነትን መለለዪ ኤርትራውያን ምንባሩ ንምዝኽኻር ኢዩ። ሎሚ’ውን መንእሰይ ወለዶ ነቲ ናይ ቀዳሞት ኣቦታት ዝናር ጅግንነት ንክዓጥቆ በዚ ኣጋጣሚ እዚ ከዘኻኽር እደሊ።

መዋእል፡ ኣዝዩ ህጣራራን ፍሉጥን ዝነበረ ዜጋ ኢዩ። ኣብቲ ንፓርላማ ዝወዳደረሉ ዝነበረ ግዜ፡ ህዝቢ ኣስመራ ንውዳሴ ዘይኮነስ፡ ብልክዕ ንምግላጽ፣ “…መዋእል መብራህቱ ኦፔል መዛወሪቱ፣ ኦሜጋ ሰዓቱ” እናበለ ይደርፈሉ ነበረ። ኣብ ህዝቡ ብዝነበሮ ጽኑዕ እምነት ድማ፡ ኣባል ፓርላማ ኮይኑ ኣገልገለ። ከም መብጽዕኡ፡ ካብ ዝተምርጸሉ ክሳብ ካብ ስራሕ ዝተሰናበተሉ ግዚ ድማ ንህዝቡ ብዝከኣሎ ዘገልገለ ዜጋ ኢዩ ዝንበረ።

ኣብ መፋርቕ ስሳታት፡ ንጉዳይ ሰውራ ኤርትራ ዝምልከት፡ ሓደ ጸገም ኣጋጢሙ ነበረ። ዋንነታ ናይ ቡልጋርያ ዝኾነት መርከብ፡ ስዉእ ዑስማን ሳልሕ ሳበ ካብ ማእከላይ ምብራቕ ናብ ሜዳ ኤርትራ ዝለኣኾ ኣጽዋር ናብ ኢድ ዋናታቱ ተጋደልቲ ኣይበጽሐን። ብኤርትራዊ ካፕተን ሸክ መሓመድ ፋርስ ኣቢሉ ናብ ከባቢ ባጽዕ /እምባ ገደም/ ናብ ገማግም ንክራገፍ ምስ ቀረበ፡ ብሓሰውቲ ተፈሊጡ ስለዝነበረ ብመንግስቲ ኢትዮጵያ እታ መርከብ ምስ ንብረታን ሰራሕተኛታት ኤርትራውያንን ተታሕዙ።

እቶም ምስ ንብረቶም ዝተማረኹ ኤርትራውያን፡ ካፕተን እታ መርከብ ዝነበረ 1.) መሓመድ ሸክ ፋርስ 2.)መምህር ዓብደላ ሳይቕ 3.) ማሕሙድ ሳበ ኢዮም ነይሮም። እቶም ሃገራውያን ምስ ተኣስሩ፡ መንግስቲ ኢትዮጵያ መን ብዛዕብኦም ከም ዝግደስ ንምክትታል፡ ንይምሰል ጠበቓ ክገብሩ ከም ዝኽእሉ ኣፍለጠ። ስለ ሃገራውነቶም ዝተኣስሩ ኤርትራውያን ጠበቓ ዝኾነሎም ተፈተሸ። ኩሎም ጠበቓታትን ናይ ሕጊ ክኢላታትን ብምኽንያት መእሰሪኦም ስለዝፈርሑ ግን ዝጣበቐሎም ሰብ ኣይረኸቡን። መዋእል መብራህቱ ሽዑ ምሁርን ናይ ሕጊ በዓል ሞያን ስለዝነበረ፡ ንገንዘብ ኢሉ ዘይኮነስ፡ ንክብሪ ናይቶም ሰብ ዝሰኣኑ ንብረት ገድሊ ኤርትራ ናብ ዋናታቱ ንምርካብ እናሰርሑ እንከለዉ ዝተኣስሩ ሃገራውያን ኣሕዋቱ ብትብዓት ጠበቓ ኮነ። ብክእለቱ ነቶም ሃገራውያን ኣሕዋቱ ተጣቢቑሎም ኢዩ።

እንተኾነ ኣብቲ ፍትሒ ዘይነበሮ ስርዓት መግዛእቲ፡ ብሞያኡ ተጣቢቑ ክገብሮ ዝኽእል ነገር ስለዘይነበረ፡ እቶም እሱራት ክፍትሑ ኣይተኻእለን። ብኣናጹ’ኳ ደኣ ኣብ ሰምበል ነፍስ-ወከፎም ን25 ዓመታት ተፈርዱ። ጅግና ሃገራዊ መልህቅ፡ መዋእል መብራህቱ “ንወንበዴታት ጠበቓ ኴንካ” ብዝብል ምስምስ ንክእሰር ተወሰነ። ሻምበል ማቴዎስ ተኽለን መቶ ኣለቃ ምናሴ መድሕንን ዝተባህሉ፡ ንመዋእል መብራህቱ ካብ ገዝኡ ኣሲሮም ናብ ኣጂፕ ወሰድዎ። በዓልቲ ቤቱ ንጅግና መዋእል ብህጹጽ ናብ ጀነራል ዘርኢማርያም ጠርዐት። ጀነራል ዘርኢማርያም’ውን ኣገዳሲ ስጉምቲ ብምውሳድ፡ ተቐላጢፉ ናብ ማእከላይ እዚ ፖሊስ፡ ናብ ኣጂፕ ብድሕሪ ምዃድ፣ “ሓደ ሰብ ብዘይ ናይ ቤት ፍርዲ ትእዛዝ ክእሰር ግቡእ ኣይኮነን” ብምባል፡ ነቶም ዝኣሰርዎ ቀልጢፎም ክፈትሕዎን፣ ብመኪና መንግስቲ ጌሮም ናብ ገዝኡ ንክወስድዎን ኣዘዞም።

ጅግና መዋእል መብራህቱ፡ ወላ’ኳ ማእሰርቲ እንተኣጋጠሞ፡ ካብ ዕላምኡ ሰጋእ ኣይበለን። መሊሱ’ውን ነቲ ሒዝዎ ዝነበረ ጉዳይ ጥብቅና ንኣሕዋቱ ቀጸሎ። ኣብ ካልእ ሃገራዊ ጉዳይ እውን መርገጺኡ ብንጹር ይገልጽ ነይሩ ኢዩ። ኣብ መወዳእታ 60ታት ስርዓት ሃይለ ስላሴ “ዓሳታት ንምጽናት፡ ባሕሪ ምንጻፍ” ብዝብል እምነቱ፡ ንሰውራ ኤርትራ ክድምስስ ወሰነ። ቅድሚ ወተሃደራዊ ወፍሪ ከኣ ኣብ መታሕት፡ ማለት ኣብ ቆላታት ኤርትራ ዝነብር ኣማኒ ምስልምና ኤርትራዊ ክጥፍእ ስለዝነበሮ፡ ሓደ እከይ ናይ ምጽናት ውጥን ኣውጸአ። ንኩላቶም ኣባላት ፓርላማ ኤርትራ ናብ ኣዲስ ኣበባ ኣጸዊዑ ድማ ሓደ እቲ ስጉምቲ ክውሰድ ምዃኑን ኩላቶም ኣባላት ፓርላማ ክሰማምዑሉ ከም ዘለዎምን ኣዘዞም። ኣብ መታሕት ንዝነብር ኣማኒ ምስልምና ንምጽናት ፈርሙ ተባህሉ። ብዙሓት ድማ ተሰማሚዖም ኢዮም።

ነፍስ-ሄር መዋእል ግን “ኣነ ልዕሊ 100 ሽሕ ህዝቢ ኣስመራ ዝወከለኒ፡ ንክሰርሓሉን ንከገልግሎን ደኣ’ምበር፡ ህዝቢ ንከጽንት ኣይኮነን” ብምባል ኣሕዋቱ ንምጽናት ምፍራም ኣበየ። ኣብ ኣኼባ ፓርላማ ኢትዮጵያ፡ ንመጀመርያ ግዜ ነቲ ኣኼባ ከኣ ረጊጽዎ ወጸ። ኣብቲ እዋን እቲ፡ ብፍላይ ድማ ኣብ ማእከል ኢትዮጵያን ኣብ ቅድሚ ንጉስን ከማኡ ዝኣመሰለ ትብዓት ምውናን መለክዒኡ ልዕሉ ሃገራውነትን ጅግንነትን ጥራይ ኢዩ ዝነበረ።

ሽዑ ሃይለ ስላሴ ብውልቂ ጸዊዑ፣ “…ወንበዴታት ኣብ በረኻ ጥራይ ዘለዉ ይመለኒ ነይሩ። ሕጂ ግን ኣብዚ ኣብ ማእከልና ከም ዘለዉ ኣረጋጊጸ ኣለኹ” በሎ። እንተኾነ መዋእል ካብቲ ዝኣምኖ ሃገራዊ ጉዳይ ምንቕ ኣይበለን። ኩላቶም ኣባላት ፓርላማ በብዝተወከሉሉ ከባቢ ናብ ኣዲስ ኣበባ ምስ ከዱ፡ ብዘይካ ወካሊ ስመጃና ዝነበረ ይኩኖኣምላክ በላይ ካልኦት ነቲ እከይ ውጥን ተሰማሚዖሙሉ ነበሩ። ይኩኖ ኣምላክ ከምቲ መርገጺ መዋእል መብራህቱ ብምሓዝ፡ ህዝቢ ንከጥፍእ ኣይሰማማዓሉን እየ ኢሉ ኢዩ። ደድሕሪ መዋእል ብምስዓብ ከኣ፡ ንኣኼባ ፓርላማ ረጊጽዎ ወጸ። እቶም ብረት ንሰውራ ኤርትራ ከቐብሉ እንከለዉ ዝተታሕዙን ናብ ሰምበል ዝተኣስሩን ሃገራውያን፡ ብድሕሪ ኣስታት 10 ዓመታት፡ ምስቶም ብ1975 ካብ ሰምበል ብፈዳይን ተጋደልቲ ተ.ሓ,ኤ. ምትሕብባር ሻምበል ወልደሃይማኖት ተኽሎምን ናጻ ወጹ።

እቶም ሃይለ ወልደትንሳኤን /ድሩዕ/ ወልደዳዊት ተመስገንን ዝርከብዎም 700 ናይ ፖለቲካ እሱራት፡ ብሳላ ተወፋይነት ኤርትራውያን ብሰላም ወጺኦም። መሓመድ ሸክ ፋርስን ብጾቱን ከም ኩላቶም ኣብ ዓዲ ንኣምን ምስ ኣተዉ ምርጫ ተዋህቦም። ናብ ውድብ ህዝባዊ ግንባር ንክስለፉ ስለዝመረጹ፡ ናብኡ ተፋነዉ። መዋእል መብራህቱ፡ ብድሕሪ ብዙሕ ሃገራዊ ቃልሱ ንወጻኢ ናብ ሃገረ ኣሜሪካ ኢዩ ተሰዲዱ ዝነብር ዝነበረ። ብወርሒ ግንቦት 2000 ዓ.ም. ኣብ ዓዲ እንግሊዝ ንሃገራውያን ኣገዳሲ ሰሚናር ኣካይዱ ዝነበረ ተባዕ ሃገራዊ ሰብ ኢዩ ነይሩ። ኣብቲ ሽዑ ዝገበሮ ሰሚናር፡ ንባህርያት ስርዓት ህግደፍ ብዘይ ነግ- ፈረግ ኣብሪሁዎ ኢዩ። ኢሰያስ ገበተ፡ ሃገር ዝገበተ፡ ህዝቢ ዝገበተ፡ ንብረት ዝገበተ፤ ብዘይ ሕጊ ዝገዝእ ዘሎ ውጹእ ምልካዊ ምዃኑ ብዘይ ጥርጥር ገሊጹ ከም ዝነበረ ብዙሓት ዝምስክርዎ ጉዳይ ኢዩ።

ስለዚ ሰብ ነባሪ ኣይኮንን፡ ከምዚ ዝኣመሰለ ታሪኽ ጅግንነት ዝፈጸመ ሰብ ኣብ ዝሓልፈሉ ግዜ፣ ታሪኹ ምትሕልልፍ ሃገራዊ ግቡእ ኢዩ። ሎሚ መንእሰይ ወለዶና፡ ነዛ ኣብ ትሕቲ መቑሕ ህግደፍ፡ ኣብ ምንጋጋ ኢሰያስ ዘላ ኤርትራ ናጻ ንከውጽኣ ከምዚ ዝኣመሰለ ስረ ንክዓጥቅ ለበዋይ አመሓላልፍ ኣለኹ። ኤርትራ ብከም መዋእል መብራህቱ ዝኣመሰሉ ጀጋኑ ዜጋታት ትልለ ዝነበረት ሃገር ኢያ። ሎሚ እውን ‘ንእሾኽ እሾኽ ተውጽኣ፡ ኣራግጻኻ ግን ኣይትቐይር’ ከም ዝበሃል፣ ኣጆኻ ኤርትራዊ መንእሰይ ስረ ኣቦታትካን ኣያታትካን ንምዕጣቕ ተዳሎ።

ከምቲ ኣብ መእተዊ ዝበልኩዎ ደጊመ፡ ንመዋእል መብራህቱ ኣምላኽ ኣብ መንግስተ ሰማያቱ ይቀበሎ።

ናይ ደገፍ መልእኽቲ ህዝባዊ ምልዕዓል ሰሜን ኣሜሪካ

ንተባዕ መልእኽቲ ካቶሊካዊ ጳጳሳት ኤርትራ

ክቡራት ካቶሊካዊ ጳጳሳት ኤርትራ፣

ኣብ ትሕቲ ልዑል ኣምላኽ ንዝተዋህበኩም ሕድሪን ሓላፍነትን ኣብ ምሉእ ፍቕርን፣ ሓቅን፣ ፍትሕን ዝተመርኮሰ፣ ንልቢ ኩሉ ኤርትራዊ ዝኹሕኩሕ መልእኽቲ ሕልናን ሓልዮትን ብምምሕልላፍኩም ክብ ዝበለ ልባዊ ምስጋናና ነቕርብ። ህዝቢ ብራዕዲ ተሸቑሪሩ ኣብ ዘለወሉ እዋን፣ ሓይሊ ነብያትን ሓዋርያትን ተላቢስኩም፣ ድንብርጽ ከይበለኩም ረዚን መልእኽቲ ብዓውታ ንህዝብኹምን ንመላእ ዓለምን ከተቃልሑ ምብቃዕኩም፣ ኣድናቆትና እናገለጽና፣ ንትሕዝቶ መልእኽትኹም ምሉእ ደገፍና ንገልጽ።

ሓውኻ ኣበይ ኣሎ? ንዝብል ሕቶኹም ንምምላስ፣ እቲ “”ጀግና ሓላዪ ሓወይ” ስድራ ቤትና ከርህዋ: ገዛና መስተርሆት ዝመልኦ ሂወት ከተስተማቕር ብምሕሳብ: ስድራና ክገዝእን ገዛና ሓዊ ከእትወላ ምስ ዝመጸ ጸላኢ ጎሮሮ ንጎሮሮ ተሓናኒቑ ንጸላኢና ስዒሩ በጃ ሃገርና ሓሊፉ። መስዋእቱ ሓላል ኢዩ ኢልና ተቐቢልናዮ ጉዕዞና ጀመርና። ቁሩብ ክይሰጎምና ግን እቲ “”ዲያብሎስ ሓወይ ዝበሃል” ብሰይጣናዊ ናይ ስልጣን ህርፋን ዓይኑ ዓዊሩ፣ ንመሬትናን ንብረትናን ገቢቱ፣ ኣብ ልዕሊ ስድራና ዓመጽን ማእሰርትን ቅትለትን ጨካን ግፍዕታትን እናውረደ፣ ስድራና ንምብትታን ለይትን መዓልትን ይስህር ኣሎ። እዚ ኩነታት`ዚ ዘሻቐሎ እቲ “”ተባዕ ሓወይ” ናይ ዓመጽን መግዛእትን መንፈስን ኣካይዳን ይኣክል፣ ኣብ ስድራና ከኣ ፍትሕን ፍቕርን ሰላምን ይንገስ ስለዝበለ በቲ “ዲያብሎስ” ተጨውዩ ተወሲዱ ስለዝተሰወረ ሃለዋቱ አበይን ከመይን ከምዘሎ ኣይፈልጥን።

ጊላ ናይ ዲያብሎስ ክኸውን ዝተፈርደን ስድርኡ ከይናቢ ዝተኸልከለን “”ንኡስ ሓወይ” ከአ ቶባእ ደጊም ኢሉ ካብ ጊላነት ከምልጥን ስድርኡ ክረድእን ሃጽ ኢሉ እግሩ ናብ ዝመረሖ ይጠፍእ ኣሎ። አብ ዘይሓሰቦን፣ አብ ታሪኽ ደቂ-አዳም ተራእዩ አብ ዘይፈልጥ ዓዘቕቲ ሽግራት ተሽሚሙ፣ ኣብ ዝኸፍአ ስቅያት ይጭወ፣ ይቕጥቀጥ ኣካላቱ ተቖራሪጹ ከም ኣቕሓ ይሽየጥ ይልወጥ ኣሎ። እቲ “”ፈራሕ ሓወይ” ከአ ብጭካኔ ናይቲ ዲያብሎስ ሪዒዱን ጃጅዩን: ኣብ ክንዲ ንዘጋጠመ ሽግር ብብልሓት ክገጥሞ ዝፍትን ተዓዚሙ: ተዓዛቢ ዕንደራ ናይቲ ዲያብሎስ ብምዃን ኣብ ስቅያትን ሕሰምን ይነብር ኣሎ።: እቲ “”ፈታው ነብሱ ኣብ ዝማዕበላ ሃገራት ዝነብር ሓወይ” ከአ እንታይ ገደሰኒ ዝዓይነቱ፣ ንሕሰም ኣሕዋቱን ስድርኡን ጸማም እዝኒ ሂቡ እናተዛነየ ይነብር ኣሎ።:

ክቡራት ጳጳሳት፣

መልእኽትኹም ንመላእ ህዝብን ሃገርን ኤርትራ ብዘይ ነሓፍነት ሓቀይና ስእሊ ኩነታት ኤርትራን ህዝባን ዘርኢ ብምዃኑ፣ ነቶም ሓኒቖም ሒዞምና ዘለዉ ሽግራት ካብ ሱር መሰረቶም ንምልላይን ንምእላይን ዓቢ ኣስተዋጽኦ ከም ዝህልዎ ምሉእ እመነት ኣሎና።

ጸጋታት ህዝብናን ሃገርናን ብቐንዶም ኣብ ውሽጢ ሕብረተሰብና ብሉዑል ኣምላኽ ዝተባረኸ፣ ካብ ወለዶ ናብ ወሎዶ ዝተሰጋገረ፣ ካብ ሓልዮትን ስኒትን ፍቕርን ምክብባርን ዝተወልደ ፍትሓዊ ጸጋታት ህዝብና ኣበይ ኣተወ? ዝብል ሕቶ ጎድኒ ጎድኒ እቲ ሓውኻ ኣበይ ኣሎ? ዝብል ሕቶ ክምለስ ይግባእ ንብል።

ፍትሓዊ ጸጋታታና፣ መሰረት ነጻነትናን ሓርነትናን ክንሱ ካብ ሱሩ እናተማሕወ ክስረዝ፣ ክብሪ ዜግነትና ክቕንጠጥ፣ ንሓሶት ከም ሓቂ፣ ንውርደት ከም ግቡእ፣ ንዓመጽ ከም ንቡር ጌርና ክንቅበሎ፣ ጉልበትናን ንብረትናን ሂወትናን – ንዕሱበ-ሰይጣን ምልካዊ ስልጣን – ክነረክብ ዝፈረድናን ዝቐሰበናን ኩነታት ይኹን ኣካል ብንጹር ምልላይ ኣድላዩ ይመስለና። ምንጪ ሽግራትና መሰረታዊ ጠንቆምን ንምልላይ ኩሉ ሸነኻዊ ፍተሻ ንምክያድ – መልእኽትኹም መብራህቲ ክኸውን`ዩ ዝብል እምነት ኣሎና።

ኣብዚ እዋን እዚ፣ እቶም ምንጪ ሽግራት ዝወለድዎም ሳዕቤናት ብኹሉ መዳያቶም ተተኲሶም፣ ህዝብን ሃገርን ኣብ ከመይ ዝበለ ኩነታት ከም ዝርከብ፣ ብምሉእ ትብዓትን ቅንዕናን ዘርዚርኩምልና። ድሕሪ ነዊሕን መሪርን ቃልሲ፣ ብከቢድ መስዋእቲ ደቂ ለዋህ ህዝቢ ዝተረኽበ ሃገራዊ ነጻነትን ልዑላውነትን ኤርትራ፣ ሃገርና ኤርትራ መደበር ሰላምን ራህዋን፣ ህዝቢ ኤርትራ ከኣ ናይ ሓርነትን፣ ዜግነታዊ ክብርን፣ ፍትሕን ኣብነት ኣብ ክንዲ ዝኸውን፣ ካብ ባዕዳዊ መግዛእቲ ዝሓሰመ ሕስረትን፣ መወዳእታ ዘይብሉ ባርነታዊ ኣገልግሎትን ከርተትን ብምፍጣሩ መላእ ህዝብን ስድራቤታትን ኤርትራ ኣብ ከቢድ ሓደጋ ወዲቖም ይርከቡ።

ከም ውጺኢቱ፣ ስድራቤታት ብዘይ ጠዋሪን ሓብሓቢን ንብዙሕ ዓመታት ግዳያት ናይ ሰብኣዊ ርህራሄ ዘይብሉ ጨካን ፖሊሲታት ኮይነን። እተን ምእንቲ ሃገራዊ ነጻነት ሰፍ ዘይብል መስዋእቲ ዝኸፈላ ስድራቤታት፣ ዓቕሚ ኣዳመ- ሄዋን ዝበጽሑ ደቀን ዳግም ጊሎት ምልካዊ ስልጣን ክኾኑ፣ ህጻውንትን ኣረገውትን ድማ ብዘይ ኣላዪን ክድርበዩ ተፈሪዶም። ኩሉ ሂወት ሃገር ተሓኒቑ፣ ቁጠባዊ መሓውራት ሃገር ለሚሱ፣ ማሕበራዊ ብልሽውናን ብዕልግናን ድማ ነጊሱ ይርከብ።

እቶም ኣብ መወዳእታ ዘይብሉ ኣገልግሎት ዝተጸምዱ መንእሰያት፣ ጸበባን ስእነትን ስድራበቶም ኣብ ቅድሚ ዓይኖም ተገቲሩ፣ ናኣሽቱ እሕዋቶምን ኣረገውቲ ወለዶምን ተደርብዮም ክርእዩ ኣብ ዘይክእሉሉ ደረጃ ምስ በጽሑ፣ ካብ ናይ ስድርኦም ጸበባ እናረኣዩ ዝሳቐዩ፣ መፍትሒ ንምርካብ ሃጽ ኢሎም ናብ ስደት የምርሑ ኣለዉ።

ስደት መሪር እዩ። ብፍላይ ናይዚ እዋን እዚ ስደት መሪር ዝገብሮ፣ እቶም ዝለዓለ ናይ ሞት ሓደጋ ሓሊፎም ዶብ ክሰግሩ ዝኸአሉ መንእሰያትን ቆልዑን ኣደታትን ኣብ ኣስካሕካሒ መጭወይትን መቕዘፍትን፣ እንስሳዊ ዓመጽን መቕተልትን ይወድቁ ኣለው። እቲ ዝኸፈአ ከኣ፣ ናውቲ ኣካላቶም ተቖራሪጹ ንመሸጣ ክወርድን ኣብ እንነብረላ ዓለም ከም ደቂ ሰባት ተኻላኻሊ ዘይብሎም ኣብ ዝኸድዎ ቦታ መጻወቲ ሸፋቱን ነጋዶ ሸይጥቲ-ሰብን ኮይንኖም ምህላውም`ዩ። ብኣሻሓት ዝቑጸሩ ኣብ ምድረበዳታትን በረኻታትን ክሃልቁን ኣብ ባሕርታት ክጥሕሉን ይግደዱ አለዉ።

ህልቀት ላምፓዱሳ – ህልቀት 361 ኤርትራውያን መንእሰያትን ቆልዑን ኣዴታትን፣ ንዓለም ዘሰምበደ ሓደጋ እዩ። ህልቀት ላምፓዱሳን ኩሎም እቶም ቅድሚኡን ድሕሪኡን ዘጋጠሙ ሓደጋታትን፣ ውጽኢትን ጽዑቕ መግለጺን ናይ እቲ ኣብ ኤርትራ ዝርከብ ሃለዋትን ሂወትን ህዝቢ ኤርትራ እዩ። “ሓውኻ ኣበይ እሎ? ዝብል ሕቶ፣ ዝወልዶም ዝዓበዩ ሕቶታት እምበኣር – ሃገርናን ህዝብናን ኣብ ከመይ ዝኣመሰለ ሃለዋት ኣሎ? ንሕና እቶም ኣብ ውሽጥን ኣብ ወጻኣን እንርከብ ህዝቢኽ እንታይ ንገብር ኣለና? እንታይከ ክንገብር ይግበኣና? ዝብሉ ሕቶታት ንኹሉም ኤርትራዊያን ዜጋታትን፣ ትካላትን ገዚፍ ብድሆ እዮም።

ከምቲ ክቡራት ኣቦታትናን መማህራናን ዝበልኩምና፣ ሃገር ማለት ህዝቢ፣ ነጻነትን ልዑላውነትን ከኣ ናይ ህዝቢ እዮም። እቲ ዓይኑ ኣፍጢጡ ዝጥምተና ዘሎ ሕቶ እምበኣር – ልዑላውነት ህዝቢ ኤርትራን፣ ልዕልና ሕግን፣ ሓርነት ዜጋታትን ኣበይ ኣሎ? ዝብል እዩ። ልዑላውነት ህዝብን፣ ልዕልና ሕግን፣ ሓርነት ዜጋታትን ኣብ ኢድ ሓደ መራሒ/ጉጅለ ብምእታዉ፣ ርህራሄ ኣልቦ ሰይጣናዊ ምልካዊ መግዛእቲ ወሊዱ። ከም ውጽኢቱ ድማ ከቢድ ናይ ጽንተት ሓደጋ ኣብ ልዕሊ ክብርቲ ሃገርና ህዝብናን ተንጠልጢሉ ይርከብ። እቲ ስዒቡ ዝመጽእ ሕቶ ከኣ፣ ናይ እዚ ከቢድ ሓደጋ ተሓታቲ መን እዩ? ዝብል እዩ። ብርግጽ፣ እቲ ንልዑላውነት ህዝቢን ልዕልና ሕጊን ሓርነት ዜጋታትን ዓምጢሩ ዝገዝእ ዘሎ ጉጅለ ዓቢ ሓላፍነት ከም ዝስከም ዘጠራጥር ኣይኮነን። ይኹን እምበር ኩሎም ዜጋታታ ኤርትራን ዓበይቲ ሃይማኖታዊን ህዝባዊን ትካላታን ምሁራትን ናይዚ ከቢድ ናይ ጽንተት ሓደጋ ተሓተቲ እዮም።

ነዚ ዓቢ ሓላፍነት እዚ ዘዘኻኽርን ዝመክርን ሓዋርያዊ መልእኽቲ ኣቦታትናን መማሃራናን ካቶሊካዊ ጳጳሳት ኤርትራ፣ ካብ ጸልማት ምልካዊ መግዛእትን ባርነትን ብምግልጋል ናብ ብርሃን ሓርነትን ፍትሕን ከመርሓና እናተመኔናን ብድጋሚ ክብርን ሞጎስን ንሓዋርያት ሓቅን ፍትሕን ሰላምን ዝኾኑ ኣቦታትናን መማህራናን ካቶሊካዊ ጳጳሳት ኤርትራ ነቕርብ።

ከም ዜጋታት ኤርትራ ኣብ ተግባር ብስሙር ቃልሲን ትጉህ ህዝባዊ ምልዕዓልን ሃገርን ህዝብን ንምድሓን ሓላፍነትና ክንፍጽም ይግባእ። ልዑል ኣምላኽ፣ ስሙር ቃልስናን ህዝባዊ ምልዕዓልናን ባሪኹ ናብ ፍትሕን ሓርነትን ሰላምን ቅሳነትን ክመርሓናን፣ ፍትሓዊ ልቦናን ዜግነታዊ ትብዓትን ጽንዓትን ከዕጥቐና ንምነ። ኩሎም ኤርትራውያን ዜጋታት ንተባዕ መልእኽቲ ክቡራት ኣቦታት ካቶሊካዊ ጳጳሳት ኤርትራ ብክፉት ልቢ ክቕበልዎን፣ ንኤርትራን ህዝባን ካብ ሓደጋ ጽንተት ንምድሓን ኣብ ስሙር ቃልሲ ህዝባዊ ምልዕዓል ንድሕነት ሃገርን ህዝብን ብንጥፈት ክሳቱፉ ንጽውዕ።

ዓወት ንስሙር ህዝባዊ ምልዕዓል ንድሕነት ሃገር
ክብርን ዝኽርን ንጅጋኑ ንሰማእታት ኤርትራ
ኣወሃሃዲ ኣካል ህዝባዊ ምልዕዓል ንድሕነት ሃገር
ሰሜን ኣሜሪካ፣ 4 ሓምለ 2014

Foreign Affairs Minister John Baird says he has sent a message to the Eritrean consulate to stop collecting a ”diaspora tax” from Eritrean-Canadians here or he will order the African nation’s consulate closed.

In response to a question from a reporter in Toronto, Baird said the practice of requiring Eritrean-Canadians to pay a tax at the consulate is ”unacceptable.”

”We share the deep concern that Eritrean-Canadians, and others, have for the work that has gone on at the consulate. We’ve repeatedly sent out strong signals that is unacceptable, it’s wrong and will not be tolerated,” Baird said.

”I gave instructions to my deputy minister several days ago to very clearly and unequivocally deliver a strong message that this activity must cease and desist, and if it doesn’t we will close the consulate,” Baird said.

Baird said the messages were sent in ”recent days” but did not specify when a shutdown of the consulate might occur.

This is just the most recent action Baird has taken against Eritrean officials in Canada over the practice of requiring expatriates to pay what the UN has condemned as a worldwide ”diaspora tax” on its nationals, valued at two per cent of their income. Last year, Baird expelled consul general Semere Ghebremariam O. Micael.

Eritreans here have complained that if they don’t pay the tax, their
families back home will suffer consequences